Sjáið tindinn!

Sumar

Fyrsti í langþráðu sumarfríi í dag. Þurrt, sól með köflum og frekar lygnt. Fyrirtaks dagur til að taka til og viðra :) Það mun ekki alveg ganga eftir því nú er verið að þvo alla glugga á blokkinni. Sjötta hæð og niðurúr. Það þýðir að mínir gluggar verða að vera harðlokaðir á meðan. Ég gæti haldið því fram að það sé í fyrsta sinn sem ég verð vör við að vera á fyrstu hæð (fyrir utan að njóta þess að vera með garð og engar tröppur).

Í gærkvöldi fórum við út að hjóla. Sigmundur fékk hjól lánað og svo geystumst við af stað. Auðvitað ætlaði Sigmundur að vera stórhuga. Hann vildi byrja á því að hjóla frá Höfðanum í laugina og svo heim. Ég er ekki eins stórhuga. Við létum Fossvoginn nægja. Í kvöld förum við aðra ferð, svo á morgun, þá hinn og endum á fimmtudag í stórkostlegum hring.

Á laugardaginn fórum við í gönguferð. Fyrst að vísu í Vogana og fylgdumst með Bryggjudegi að hluta. Svo gengum við. Við gengum eftir endilögðu Oddafelli og aðeins í kring. Hituðum upp með því að ganga á nokkra hóla og niður í gíga. Veðrið var afbragð. Við komum eins og steiktir tómatar heim :)

Ég lýsi eftir sandölum, lokuðum í tána. Ég á eina sem eru nokkuð lúnir vegna þess að ég hef lítið hugsað um þá. Sá par sem mig langaði í. Grænt og gróft. Verðið var ekki að mínum smekk. Kannski menga ég andrúmsloftið og fer á milli búða til að athuga hvort ég finni skó við hæfi. Kannski flikka ég upp á þá sem ég á. Bursta upp, ber á þá feiti og læt sauma upp þar sem saumurinn er sprunginn.

Langt á milli

Ekki get ég skrifað að það sé skammt stórra högga á milli þegar ég blogga.
Nú liðu rúmar þrjár vikur milli skrifa og lítið nýtt að frétta.

Ég hjólaði og hjólaði. Náði að hjóla heilmikið og heillaðist aftur af fararmátanum. Viðurkenni að mér hugnast ekki að hjóla í Reykjavík, umferðin, gatnamót, stígarnir. Líkast til má segja að ég haldi að Akurnesingar og Vogafólk umhverfist í Reykjavíkurpakk þegar til borgarinnar er komið